కలం, స్పోర్ట్స్ : ఐపీఎల్ 2027 సీజన్ కోసం ఢిల్లీ క్యాపిటల్స్ (Delhi Capitals) యాజమాన్యం తమ కొత్త స్పిన్ బౌలింగ్ కోచ్‌గా వెటరన్ లెగ్ స్పిన్నర్ అమిత్ మిశ్రాను (Amit Mishra) నియమించింది. అక్టోబర్ 21, 2026న ఈ విషయాన్ని అధికారికంగా ప్రకటించింది. ఢిల్లీ జట్టుతో సుదీర్ఘ అనుబంధం ఉన్న మిశ్రాకు కోచ్‌గా ఇది తొలి అనుభవం కానుంది. అమిత్ మిశ్రా తన కెరీర్‌లో వేర్వేరు ఫ్రాంచైజీల తరఫున మూడు హ్యాట్రిక్‌లు సాధించిన ఏకైక బౌలర్‌గా రికార్డు సృష్టించారు. 2008లో ఢిల్లీ డేర్‌డెవిల్స్ తరఫున, 2011లో డెక్కన్ ఛార్జర్స్ తరఫున, 2013లో సన్‌రైజర్స్ హైదరాబాద్ జెర్సీతో ఈ ఘనత సాధించారు.
ఐపీఎల్‌లో మొత్తం 162 మ్యాచ్‌లు ఆడిన మిశ్రా 174 వికెట్లు పడగొట్టారు. తన 16 ఏళ్ల ఐపీఎల్ కెరీర్‌లో దాదాపు 10 సీజన్లు ఢిల్లీ జట్టు తరఫునే ఆడారు. 2024 ఐపీఎల్ సీజన్ తర్వాత ఆయన అన్ని రకాల క్రికెట్‌కు విరమణ ప్రకటించారు. ఇప్పుడు అదే ఢిల్లీ ఫ్రాంచైజీకి స్పిన్ కోచ్‌గా తిరిగి రావడం విశేషం. ఐపీఎల్ 2027 సీజన్ కోసం ఢిల్లీ క్యాపిటల్స్ తమ కోచింగ్ బృందాన్ని పూర్తిగా పునర్నిర్మించింది. జట్టు ప్రధాన కోచ్‌గా సౌరవ్ గంగూలీ, అసిస్టెంట్ అండ్ బ్యాటింగ్ కోచ్‌గా యువరాజ్ సింగ్, ఫాస్ట్ బౌలింగ్ కోచ్‌గా చమింద వాస్ నియమితులయ్యారు.
మిశ్రా రాకతో బౌలింగ్ విభాగంలో కీలకమైన కోచింగ్ సెటప్ పూర్తయింది. కొత్త సీజన్ కోసం ఢిల్లీ జట్టు స్పిన్ విభాగాన్ని మరింత బలోపేతం చేసుకుంది. సన్‌రైజర్స్ హైదరాబాద్ నుంచి లెఫ్ట్ ఆర్మ్ రిస్ట్ స్పిన్నర్ జీషాన్ అన్సారీని ట్రేడ్ ద్వారా తీసుకుంది. వీరితో పాటు యువ లెగ్ స్పిన్నర్లు విప్రాజ్ నిగమ్, రేహాన్ అహ్మద్‌లకు అమిత్ మిశ్రా మార్గదర్శకత్వం అందించనున్నారు.
