క‌లం, స్పోర్ట్స్: జపాన్‌లో ఆసియా పారా గేమ్స్ (Asian Para Games) ఘనంగా ప్రారంభమయ్యాయి. ఆసియా ఖండంలోని పారా అథ్లెట్లు తమ సత్తా చాటేందుకు సిద్ధమయ్యారు. అక్టోబర్ 18 నుంచి 24 వరకు జరిగే ఈ పోటీల్లో భారత్ భారీ లక్ష్యంతో బరిలోకి దిగింది. ఈసారి సుమారు 100 పతకాలు సాధించాలని భారత బృందం ఆశిస్తోంది. నాగోయాలోని పలొమా మిజుహో స్టేడియంలో ప్రారంభ వేడుకలు జరిగాయి. ఈసారి తొలిసారిగా ఆసియా పారా గేమ్స్‌కు జపాన్ ఆతిథ్యమిస్తోంది. ఆసియా పారా స్పోర్ట్స్ చరిత్రలో తొలిసారి మొత్తం 45 దేశాలు ఈ పోటీల్లో పాల్గొంటున్నాయి. ప్రారంభ వేడుకల్లో భారత పతాకధారులుగా ప్రమోద్ భగత్, సిమ్రన్ శర్మ వ్యవహరించారు.
భవినా పటేల్‌కు కీలక మ్యాచ్ ముందు విశ్రాంతి కల్పించేందుకు ఈ నిర్ణయం తీసుకున్నారు. 2020 పారాలింపిక్స్‌లో రజత పతకం గెలిచిన భవినాకు అక్టోబర్ 19న క్వార్టర్‌ఫైనల్ మ్యాచ్ ఉంది. ప్రారంభ వేడుకలకు వెళ్లి రావడానికి దాదాపు ఆరు గంటలు ప్రయాణించాల్సి ఉండటంతో ఆమెకు విశ్రాంతి సమయం తగ్గుతుందని అధికారులు భావించారు. అందుకే పోటీలకు సన్నద్ధతకు ప్రాధాన్యం ఇచ్చారు. భారత్ పతకాల ఆశల్లో పారా అథ్లెటిక్స్, పారా బ్యాడ్మింటన్ కీలకంగా నిలవనున్నాయి.
అథ్లెటిక్స్‌లోనే ఆరు పతకాలు వస్తాయని, వాటిలో రెండు నుంచి మూడు స్వర్ణాలు ఉండొచ్చని కోచ్ సత్యనారాయణ అంచనా వేశారు. హైజంపర్ నిషాద్ కుమార్ మంచి ప్రదర్శనతో పాటు గేమ్స్ రికార్డును కూడా బద్దలు కొట్టే అవకాశం ఉందని ఆశాభావం వ్యక్తం చేశారు. అక్టోబర్ 24 వరకు అథ్లెటిక్స్, స్విమ్మింగ్, బ్యాడ్మింటన్, ఆర్చరీ, షూటింగ్, పవర్‌లిఫ్టింగ్ సహా పలు విభాగాల్లో పోటీలు జరగనున్నాయి. భారత అథ్లెట్లు తమ సన్నద్ధతను పతకాలుగా మార్చుకుని దేశానికి మంచి ఫలితాలు అందించడంపై దృష్టి పెట్టారు.
