కలం, మునుగోడు : రాష్ట్ర ప్రభుత్వం ఎంతో ప్రతిష్టాత్మకంగా చేపట్టిన ఇందిరమ్మ ఇండ్ల (Indiramma Indlu) పథకం పేదల జీవితాల్లో వెలుగులు నింపే గొప్ప కార్యక్రమని, అయితే క్షేత్రస్థాయిలో ఉన్న కొన్ని సాంకేతిక సమస్యల వల్ల నిజమైన అర్హులు నష్టపోకుండా నిబంధనలను సడలించాలని మునుగోడు ఎమ్మెల్యే కోమటిరెడ్డి రాజగోపాల్ రెడ్డి (Komatireddy Raj gopal Reddy) ప్రభుత్వాన్ని కోరారు. గురువారం జరిగిన అసెంబ్లీ సమావేశాల్లో ఇందిరమ్మ ఇండ్ల పథకంపై జరిగిన చర్చలో ఆయన మాట్లాడారు.
నిరుపేదల సంక్షేమాన్ని కాంక్షిస్తూ ప్రభుత్వం చేపట్టిన ఈ పథకానికి గాను ముఖ్యమంత్రికి, గృహ నిర్మాణ శాఖ మంత్రి పొంగులేటి శ్రీనివాస్ రెడ్డికి ఆయన ధన్యవాదాలు తెలిపారు. గ్రామీణ ప్రాంతాల్లో ఆటోలు నడుపుకునేవారు, పాత ఇనుప సామాను వ్యాపారం చేసేవారు, ట్రాక్టర్ల ద్వారా వ్యవసాయ పనులు చేసుకుంటూ బతుకుతెరువు సాగించే నిరుపేదలు చిన్నచిన్న కారణాల వల్ల ఇందిరమ్మ ఇండ్ల ఎంపికలో అవకాశాన్ని కోల్పోతున్నారని రాజగోపాల్ రెడ్డి ఆవేదన వ్యక్తం చేశారు.
బతుకుదెరువు కోసం కొనుగోలు చేసుకున్న వాహనాలు ఉన్నాయనే నెపంతో వారిని అనర్హులుగా మార్చడం సరికాదని, అధికారులతో సమీక్షించి ఈ విషయంలో నిబంధనలను సడలించాలని కోరారు. “ఎంతమందికి ఇండ్లు కట్టిస్తున్నామనేది ప్రాధాన్యం కాదు.. నిజమైన అర్హులకు ఎంతమందికి ఇండ్లు ఇచ్చామన్నదే ముఖ్యం. ప్రభుత్వం ఇచ్చే ప్రతి ఇల్లు నిజమైన పేదవాడికే దక్కాలి” అని స్పష్టం చేశారు.
ప్రస్తుతం నిర్మాణ వ్యయం విపరీతంగా పెరిగిందని, బేస్‌మెంట్ స్థాయికే రూ.3 లక్షల పైచిలుకు ఖర్చవుతోందని పేర్కొన్నారు. ఒక ఇందిరమ్మ ఇల్లు పూర్తి కావడానికి కనీసం రూ.10 లక్షలు అవుతోందని, దీంతో మంజూరైనప్పటికీ ఇల్లు నిర్మించుకోలేని స్థితిలో చాలామంది పేదలు ఉన్నారని సభ దృష్టికి తెచ్చారు. ఈ నేపథ్యంలో ఇందిరమ్మ ఇండ్లకు ప్రభుత్వం ఇచ్చే ఆర్థిక సహాయాన్ని పెంచాలని, దీనిపై మంత్రి పునరాలోచించాలని కోరారు. గ్రామాల్లో అసలు ఇంటి స్థలం కూడా లేని నిరుపేదలు ఎంతోమంది ఉన్నారని, వారిని గుర్తించి ముందుగా ప్రభుత్వమే ఉచితంగా ఇంటి స్థలాలు కేటాయించి, ఆ తర్వాత ఇందిరమ్మ ఇండ్లు మంజూరు చేస్తే బాగుంటుందని సూచించారు.
ఇటీవల ప్రభుత్వం తీసుకొచ్చిన జీవో నిబంధనల వల్ల మొదటి విడతలో ఇండ్లు మంజూరై నిర్మాణాలు చేపట్టిన లబ్ధిదారులకు బిల్లులు రాక ఇబ్బందులు పడుతున్నారని రాజగోపాల్ రెడ్డి తెలిపారు. మొదటి విడతలో ఇండ్లు కట్టుకుంటున్న వారికి ఈ జీవో నిబంధనల నుంచి మినహాయింపు ఇచ్చి తక్షణమే బిల్లులు విడుదలయ్యేలా చూడాలని ప్రభుత్వానికి విజ్ఞప్తి చేశారు.
Also Read : షాకింగ్: కేటీఆర్, హరీశ్‌రావులపై లైంగిక వేధింపుల కేసు!
Follow Us On : WhatsApp
