గర్వమే పాక్ జట్టును దెబ్బతీసింది.. మహమ్మద్ యూసఫ్ సంచలన వ్యాఖ్యలు

కలం, స్పోర్ట్స్: పాకిస్థాన్ క్రికెట్ జట్టు (Pakistan Cricket Team) పతనంపై పాక్ మాజీ స్టార్ క్రికెటర్ మహమ్మద్ యూసఫ్ (Mohammad Yousuf) ఘాటు వ్యాఖ్యలు చేశారు. 2021 టీ20 వరల్డ్ కప్‌లో భారత్‌ను ఘోరంగా ఓడించామన్న గర్వమే పాక్ జట్టును ఇప్పుడు అధఃపాతాళానికి తొక్కేసిందంటూ హాట్ కామెంట్స్ చేశారు. ఆ మ్యాచ్‌కు ముందు వరల్డ్ కప్‌లో భారత్‌ను ఓడించిన చరిత్ర పాకిస్థాన్‌కు లేదని ఆయన గుర్తు చేశారు.

ఆ మ్యాచ్ సమయంలో పాక్ నిజంగా ఇంటర్నేషనల్ స్థాయి జట్టుగా రాణించిందని, కానీ ఆ విజయం తర్వాత ప్రతి ప్లేయర్‌కి కళ్లు నెత్తికి ఎక్కాయంటూ ఘాటు విమర్శలు చేశారు. ఒక టీవీ ఇంటర్వ్యూలో మాట్లాడిన యూసఫ్.. ఆ గెలుపు తర్వాత ఆటగాళ్లు తాము ఏదో పెద్దది సాధించామనే భ్రమలో ఉండిపోయారని, తర్వాతి లక్ష్యాలపై దృష్టి పెట్టలేకపోయారని పేర్కొన్నారు.

కెప్టెన్సీపైనే అందరి ఫోకస్

కెప్టెన్సీ కోసం పాకులాట.. బాధ్యత మరిచిన ఆటగాళ్లుజట్టు ప్రదర్శన కంటే ఆటగాళ్లు కెప్టెన్సీ దక్కించుకోవడంపైనే ఎక్కువ ఆసక్తి చూపించారని యూసుఫ్ (Mohammad Yousuf) మండిపడ్డారు. గత నాలుగైదేళ్లుగా వన్డే, టీ20 ప్రపంచకప్‌లు, ఆసియా కప్‌లలో పాక్ అత్యంత ఘోరమైన క్రికెట్ ఆడిందని గుర్తుచేశారు. పాకిస్థాన్ క్రికెట్ బోర్డు (పీసీబీ) ఎంతో మద్దతు నిచ్చి, కోచ్‌లను మార్చినప్పటికీ ఏ ఒక్క ఆటగాడు కూడా బాధ్యత తీసుకోలేదని ఆవేదన వ్యక్తం చేశారు. ఇటీవల బంగ్లాదేశ్‌ చేతిలో ఎదురైన 0-2 ఘోర పరాజయం కూడా జట్టు నాయకత్వ లోపాన్ని ఎత్తిచూపుతోందని అన్నారు.

పీసీబీ కఠిన నిర్ణయాలు సరైనవే!

ప్రస్తుత ఇంగ్లండ్ టెస్ట్ సిరీస్‌లో పాకిస్థాన్ ఘోరంగా విఫలమైంది. హెడింగ్లీ టెస్టులో ఇన్నింగ్స్ 103 పరుగులు, లార్డ్స్ టెస్టులో 194 పరుగుల తేడాతో భారీ ఓటములను చవిచూసింది. దీంతో సిరీస్ మధ్యలోనే పీసీబీ కఠిన చర్యలు చేపట్టింది. మహమ్మద్ రిజ్వాన్, ఇమామ్-ఉల్-హక్‌లతో సహా ఏడుగురు ఆటగాళ్లను స్వదేశానికి పంపించివేసింది. అలాగే హెడ్ కోచ్ సర్ఫరాజ్ అహ్మద్, అసిస్టెంట్ కోచ్ ఉమర్ గుల్‌లను బాధ్యతల నుంచి తప్పించింది.

అట్టడుగున పాక్

పీసీబీ తీసుకున్న ఈ ఆకస్మిక నిర్ణయాలను యూసుఫ్ పూర్తిగా సమర్థించారు. ప్రపంచ టెస్ట్ ఛాంపియన్‌షిప్ (డబ్ల్యూటీసీ) పట్టికలో మొత్తం 9 టీమ్‌లలో పాకిస్థాన్ చివరి (9వ) స్థానంలో ఉందన్న విషయాన్ని ఆయన గుర్తు చేశారు. దేశ ప్రతిష్ట దెబ్బతింటున్నప్పుడు బోర్డు ఇలాంటి కఠిన నిర్ణయాలు తీసుకోవడంలో తప్పులేదని, అయితే డ్రెస్సింగ్ రూమ్‌లో ఏదో జరగడం వల్లే ఆటగాళ్లను మధ్యలోనే ఇంటికి పంపించి ఉంటారని ఆయన అనుమానం వ్యక్తం చేశారు.

Also Read : గ్లోబల్ చెస్ లీగ్‌లో అమెరికన్ గాంబిట్స్ ఊచకోత

Follow Us On: X(Twitter)