కలం, జోగుళాంబ గద్వాల : జోగులాంబ గద్వాల (Gadwal Accident) జిల్లా పరిధిలోని 44వ నంబర్ జాతీయ రహదారిపై ఆదివారం ఘోర రోడ్డు ప్రమాదం చోటు చేసుకుంది. ఎర్రవల్లి మండలం 10వ పోలీస్ బెటాలియన్ ఎదురుగా ఉన్న ఎన్ హెచ్ 44 రోడ్డు పై కర్నూల్ వైపు వేగంగా వెళ్తున్న ఒక కారు ముందుగా వెళ్తున్న లారీని బలంగా ఢీకొట్టింది. ఈ ప్రమాదంలో కారులో ప్రయాణిస్తున్న ఇద్దరు మృతి చెందగా, ఇద్దరికి గాయాలయ్యాయి.
ఇటిక్యాల ఎస్ఐ రవి నాయక్ తెలిపిన వివరాల ప్రకారం.. హైదరాబాద్ కు చెందిన ముఖేష్ కుమార్ ఒక కన్సల్టెన్సీ కంపెనీ నిర్వహిస్తున్నారు. అదే కంపెనీలో గద్వాల ప్రాంతానికి చెందిన రాఘవ పని చేస్తున్నారు. ఈ క్రమంలో ఆదివారం తెల్లవారుజామున ముఖేష్, అతని బందువులైన సాయిరాం(38), మౌనిక(25)లతో పాటు రాఘవ నలుగురు కలిసి అలంపూర్ లోని శ్రీజోగుళాంబ అమ్మవారి దర్శనానికి కారులో బయలుదేరారు. ఎర్రవల్లి మండలంలోని 10వ పోలీస్ బెటాలియన్ పెట్రోల్ బంక్ ఎదురుగా ఉన్న జాతీయ హైవే పై అలంపూర్ వైపు వెళ్తుండగా ముందుగా వెళ్తున్న లారీని కారు బలంగా ఢీకొట్టింది.
దీంతో కారులో ఉన్న సాయిరాం, మౌనిక సంఘటన స్థలంలో మృతి చెందగా ముఖేష్, రాఘవ గాయపడారు. ప్రమాద సమయంలో కారును ముఖేష్ నడుపుతున్నారు. ప్రమాదాన్ని గమనించిన స్థానికులు వెంటనే పోలీసులకు సమాచారం అందించారు. ఘటన స్థలానికి చేరుకున్న ఇటిక్యాల ఎస్ఐ రవి నాయక్ ఆధ్వర్యంలో పోలీసులు సహాయక చర్యలు చేపట్టి, మృతదేహాలను పోస్టుమార్టం నిమిత్తం గద్వాల ప్రభుత్వ ఏరియా ఆసుపత్రికి తరలించారు. ఈ ప్రమాదానికి అతివేగం కారణమా?, డ్రైవర్ నిద్రమత్తే కారణమా? అనే కోణంలో పోలీసులు కేసు నమోదు చేసుకుని దర్యాప్తు జరుపుతున్నారు.
