కలం, వెబ్‌డెస్క్: సద్దుల బతుకమ్మ వేడుకల సందర్భంగా మంచిర్యాల జిల్లాలో కాంగ్రెస్ పార్టీకి చెందిన రెండు వర్గాల మధ్య ఘర్షణ (Congress Group Clash) చోటుచేసుకుంది. దండేపల్లి మండలం తాళ్లపేట గ్రామంలో జరిగిన ఈ ఘటన స్థానికంగా కలకలం రేపింది. పండుగ వేళ ఆనందోత్సాహాలతో సాగాల్సిన వేడుకల్లో వివాదం తలెత్తడంతో గ్రామస్థులు ఆందోళనకు గురయ్యారు.
తాళ్లపేట గ్రామంలో సద్దుల బతుకమ్మ సంబరాలు (Saddula Bathukamma Celebrations) జరుగుతున్న సమయంలో కాంగ్రెస్‌కు చెందిన ప్రేమ్ సాగర్ రావు, జగన్ మోహన్ రావు వర్గాల మధ్య వివాదం మొదలైనట్లు సమాచారం. తొలుత మాటామాటా పెరగడంతో ఇరు వర్గాల మధ్య వాగ్వాదం చోటుచేసుకుంది. అనంతరం పరిస్థితి అదుపుతప్పి ఘర్షణకు దారితీసింది. ఇరువర్గాలకు చెందిన వారు పరస్పరం దాడులకు దిగడంతో అక్కడ ఉద్రిక్త వాతావరణం నెలకొంది.
ఈ ఘటనలో పలువురు మహిళలు గాయపడినట్లు సమాచారం. గాయపడిన వారిని చికిత్స నిమిత్తం ఆస్పత్రులకు తరలించినట్లు తెలిసింది. పండుగ వేడుకల సమయంలో జరిగిన ఈ ఘర్షణతో స్థానికంగా చర్చనీయాంశంగా మారింది. కాంగ్రెస్‌లోని రెండు వర్గాల మధ్య వివాదం తలెత్తడానికి గల పూర్తి కారణాలు ఇంకా స్పష్టంగా తెలియాల్సి ఉంది. ఇలాంటి సంఘటనలు పండుగల సమయంలో చోటుచేసుకోవడంపై స్థానికులు ఆందోళన వ్యక్తం చేస్తున్నారు. పరిస్థితులు ప్రశాంతంగా ఉండేలా సంబంధిత అధికారులు చర్యలు తీసుకోవాలని కోరుతున్నారు.
