కలం, వెబ్‌డెస్క్: దసరా పండుగల వేళ హైదరాబాద్ పోలీస్ శాఖలో కీలక పరిపాలనా మార్పులు చోటుచేసుకున్నాయి. నగరంలో శాంతిభద్రతలను మరింత పటిష్ఠం చేయడంతో పాటు పోలీస్ విభాగాల పనితీరును మెరుగుపరిచే లక్ష్యంతో భారీగా సబ్‌ ఇన్‌స్పెక్టర్ల బదిలీలు చేపట్టారు. హైదరాబాద్ పోలీస్ కమిషనరేట్ పరిధిలోని వివిధ పోలీస్ స్టేషన్లలో విధులు నిర్వహిస్తున్న 75 మంది ఎస్సైలను బదిలీ (Sub Inspectors Transferred) చేస్తూ పోలీస్ కమిషనర్ వీసీ సజ్జనార్ (CP Sajjanar)ఉత్తర్వులు జారీ చేశారు.
నగరంలో నేరాల నియంత్రణ, ప్రజల భద్రత, పోలీస్ వ్యవస్థలో సమర్థవంతమైన సేవలను అందించడంపై అధికారులు ప్రత్యేక దృష్టి సారించారు. ఇందులో భాగంగా సుదీర్ఘకాలంగా ఒకే ప్రాంతంలో పనిచేస్తున్న పలువురు ఎస్సైలకు ఇతర పోలీస్ స్టేషన్లు, విభాగాల్లో బాధ్యతలు అప్పగించినట్లు సమాచారం. లా అండ్ ఆర్డర్, ట్రాఫిక్, క్రైమ్ విభాగాలతో పాటు కంట్రోల్ రూమ్‌లలోనూ సిబ్బంది మార్పులు చేపట్టినట్లు తెలుస్తోంది.
బదిలీ ఉత్తర్వులు అందుకున్న అధికారులు తమకు కేటాయించిన కొత్త స్థానాల్లో వెంటనే బాధ్యతలు స్వీకరించాలని సీపీ సజ్జనార్ స్పష్టం చేశారు. విధుల స్వీకరణలో నిర్లక్ష్యం వహించినా, ఉత్తర్వుల అమలులో అలసత్వం ప్రదర్శించినా కఠిన చర్యలు తప్పవని హెచ్చరించినట్లు పోలీస్ వర్గాలు తెలిపాయి.
రాబోయే పండుగల నేపథ్యంలో నగరంలో పెరగనున్న ప్రజల రద్దీ, ట్రాఫిక్ సమస్యలు, భద్రతాపరమైన అవసరాలను దృష్టిలో ఉంచుకుని ఈ బదిలీలు చేపట్టినట్లు తెలుస్తోంది. అయితే, ఒకేసారి 75 మంది ఎస్సైలకు స్థానచలనం కల్పించడం పోలీస్ శాఖలో చర్చనీయాంశంగా మారింది.
Also Read : ఆగి ఉన్న లారీని ఢీకొట్టిన ఆర్టీసీ బస్సు.. 15 మందికి గాయాలు
Follow Us On: Youtube
