కలం, స్పోర్ట్స్: టీమిండియా సెలక్షన్ కమిటీకి కొత్త చైర్మన్‌గా ప్రగ్యాన్ ఓజా (Pragyan Ojha) బాధ్యతలు చేపట్టనున్నట్లు సమాచారం. ఇప్పటివరకు తాత్కాలిక చైర్మన్‌గా వ్యవహరిస్తున్న ఆయననే పూర్తిస్థాయి చైర్మన్‌గా నియమించే అవకాశం ఉంది. ఈ మేరకు అధికారిక ప్రకటన వెలువడాల్సి ఉంది. మరోవైపు, మాజీ స్పిన్నర్ రమేశ్ పొవార్ కూడా సీనియర్ సెలక్షన్ కమిటీలో చేరనున్నట్లు తెలుస్తోంది. అజిత్ అగార్కర్ తప్పుకోవడంతో సీనియర్ పురుషుల సెలక్షన్ కమిటీలో ఈ మార్పులకు అవకాశం ఏర్పడింది. ఆయన స్థానంలో ఎవరిని నియమించాలనే అంశంపై చర్చ జరిగింది.
ఈ పదవికి ప్రగ్యాన్ ఓజాతో పాటు మాజీ వికెట్ కీపర్ పార్తివ్ పటేల్ పేరు కూడా పరిశీలనకు వచ్చింది. అయితే, పార్తివ్ దరఖాస్తు చేయకపోవడంతో ఓజా నియామకానికి మార్గం సుగమమైనట్లు నివేదికలు పేర్కొన్నాయి. ప్రగ్యాన్ ఓజా ప్రస్తుతం దక్షిణ జోన్‌కు ప్రాతినిధ్యం వహిస్తున్నారు. భారత్ తరఫున 24 టెస్టులు ఆడిన అనుభవం ఆయనకు ఉంది. సెలక్షన్ కమిటీలోని ఇతర సభ్యులతో పోలిస్తే ఆయనకు టెస్టుల్లో ఎక్కువ అనుభవం ఉండటం కూడా కీలకంగా మారింది.
ఇదే సమయంలో, పశ్చిమ జోన్ నుంచి రమేశ్ పొవార్ సెలెక్టర్‌గా బాధ్యతలు చేపట్టే అవకాశం ఉంది. అగార్కర్ స్థానంలో ఓజా చైర్మన్‌గా వ్యవహరిస్తే, పొవార్ కమిటీలో మరో సభ్యుడిగా చేరనున్నారు. పొవార్ భారత్ తరఫున రెండు టెస్టులు, 31 వన్డేలు ఆడారు. గతంలో భారత మహిళల జట్టుకు రెండుసార్లు ప్రధాన కోచ్‌గా పనిచేశారు. మరోవైపు, జూనియర్ పురుషుల సెలక్షన్ కమిటీ చైర్మన్‌గా మాజీ స్పిన్నర్ దొడ్డ గణేశ్ పేరు వినిపిస్తోంది. భారత్ తరఫున ఒక టెస్టు, నాలుగు వన్డేలు ఆడిన ఆయన ఈ బాధ్యతలు చేపట్టే అవకాశం ఉంది.
ఈ పదవికి మాజీ దేశవాళీ క్రికెటర్ అర్జున్ యాదవ్ పేరు కూడా పరిశీలనలో ఉన్నట్లు సమాచారం. జూనియర్ సెలక్షన్ కమిటీలో అరుణ్ శర్మ, ఎల్. పవార్, దీప్ బోరా, పంకజ్ సింగ్‌లకు కూడా చోటు దక్కే అవకాశం ఉందని నివేదికలు పేర్కొన్నాయి. అయితే, ప్రగ్యాన్ ఓజా పూర్తిస్థాయి చైర్మన్‌గా నియమితులయ్యారా? ఇతర సభ్యుల ఎంపికపై ఎలాంటి నిర్ణయం తీసుకున్నారు? అనే అంశాలపై అధికారిక ప్రకటన రావాల్సి ఉంది. బీసీసీఐ ప్రకటనతోనే ఈ నియామకాలపై పూర్తి స్పష్టత రానుంది.
