కలం, స్పోర్ట్స్: టీమిండియా మాజీ కెప్టెన్‌ ఎంఎస్‌ ధోనీ తన బౌలింగ్‌ కెరీర్‌పై చూపిన ప్రభావాన్ని స్పిన్నర్‌ యుజ్వేంద్ర చాహల్‌ గుర్తుచేసుకున్నాడు. ధోనీ అనుభవం వల్ల తనతో పాటు కుల్దీప్‌ యాదవ్‌ బౌలింగ్‌ చేయడం సులభమయ్యేదని తెలిపాడు. తాజాగా ఆకాశ్‌ చోప్రా యూట్యూబ్‌ ఛానల్‌లో జరిగిన పాడ్‌కాస్ట్‌లో ఈ విషయాలను పంచుకున్నాడు. ఈ ఇంటర్వ్యూ వివరాలు అక్టోబర్‌ 15న వెలువడ్డాయి. వికెట్‌ వెనుక ఉండి ధోనీ మ్యాచ్‌ను నిశితంగా గమనించేవాడని చాహల్‌ చెప్పాడు.
పిచ్‌ పరిస్థితులకు తగ్గట్టుగా బౌలింగ్‌ చేయాలని సూచించేవాడని వివరించాడు. ముఖ్యంగా స్టంప్స్‌ లక్ష్యంగా బంతులు వేయాలని చెప్పేవాడని గుర్తుచేసుకున్నాడు. 2018లో దక్షిణాఫ్రికాతో సెంచూరియన్‌లో జరిగిన రెండో వన్డేను చాహల్‌ ప్రత్యేకంగా ప్రస్తావించాడు. ఆ మ్యాచ్‌లో అతడు 22 పరుగులిచ్చి ఐదు వికెట్లు తీశాడు. దక్షిణాఫ్రికా 118 పరుగులకే ఆలౌటైంది. కుల్దీప్‌ యాదవ్‌ మూడు వికెట్లు పడగొట్టాడు. భారత్‌ తొమ్మిది వికెట్ల తేడాతో విజయం సాధించింది.
ఆ మ్యాచ్‌లో జేపీ డుమినీని ఔట్‌ చేసేందుకు ధోనీ ఇచ్చిన సలహా ఉపయోగపడిందని చాహల్‌ తెలిపాడు. స్టంప్స్‌ లక్ష్యంగా బౌలింగ్‌ చేస్తూ, తనకు అనుకూలంగా వేగాన్ని మార్చుకోవాలని ధోనీ సూచించాడని చెప్పాడు. ఆ వ్యూహంతో డుమినీని ఎల్బీడబ్ల్యూగా ఔట్‌ చేయగలిగానని గుర్తుచేసుకున్నాడు. ధోనీ రిటైర్మెంట్‌ తర్వాత అతడి లోటు కనిపించిందని చాహల్‌ అంగీకరించాడు. అయితే, అప్పటికే తనను, కుల్దీప్‌ను సొంతంగా నిర్ణయాలు తీసుకునే స్థాయికి ధోనీ సిద్ధం చేశాడని పేర్కొన్నాడు.
