కలం, వెబ్ డెస్క్: క్రికెట్ ప్రపంచంలో ఒక సువర్ణ అధ్యాయం ముగిసింది. ఆట చరిత్రలోనే అత్యుత్తమ ఆల్రౌండర్గా పేరు తెచ్చుకున్న వెస్టిండీస్ మాజీ కెప్టెన్ గార్ఫీల్డ్ సోబర్స్ (Garfield Sobers) శుక్రవారం కన్నుమూశారు. 89 ఏళ్ల వయసున్న ఆయన మరణవార్తను ఆయన కుమారుడు డానియల్ ధృవీకరించారు. మరో పది రోజుల్లో 90వ పుట్టినరోజు జరుపుకోవాల్సిన సోబర్స్, ఇలా అనంత లోకాలకు వెళ్లడం క్రీడా లోకాన్ని తీవ్ర దిగ్భ్రాంతికి గురిచేసింది.
సోబర్స్ క్రికెట్ ప్రస్థానం ఎంతో అద్భుతమైనది. ఆయన 1954 నుండి 1974 వరకు వెస్టిండీస్ జట్టుకు ప్రాతినిధ్యం వహించారు. తన 20 ఏళ్ల సుదీర్ఘ కెరీర్లో ఆయన ఎన్నో రికార్డులను సృష్టించారు. ఆయన ఆడిన మొత్తం 93 టెస్ట్ మ్యాచ్లలో 57.78 సగటుతో 8,032 పరుగులు సాధించారు. ఇందులో 26 సెంచరీలు, 30 హాఫ్ సెంచరీలు ఉన్నాయి. కేవలం బ్యాటింగ్లోనే కాకుండా లెఫ్ట్ ఆర్మ్ ఫాస్ట్ మీడియం బౌలర్గా రాణించిన ఆయన, టెస్టుల్లో 235 వికెట్లు పడగొట్టారు.
అలాగే తన కెరీర్లో ఆడిన ఏకైక వన్డే ఇంటర్నేషనల్ మ్యాచ్లోనూ ఒక వికెట్ సాధించడం విశేషం. ఆయన కెరీర్లో కొన్ని మరపురాని రికార్డులు కూడా ఉన్నాయి. 1958లో పాకిస్తాన్తో జరిగిన మ్యాచ్లో సోబర్స్ నాటౌట్గా నిలిచి 365 పరుగులు చేశారు. టెస్ట్ క్రికెట్ చరిత్రలోనే ఒక బ్యాటర్ చేసిన అత్యధిక స్కోరుగా ఈ ఇన్నింగ్స్ ఏకంగా 36 ఏళ్ల పాటు రికార్డుల్లో నిలిచిపోయింది.
ఆ తర్వాత 1994లో వెస్టిండీస్కే చెందిన బ్రియన్ లారా 375 పరుగులు చేసి ఈ రికార్డును అధిగమించారు. అలాగే ఫస్ట్ క్లాస్ క్రికెట్లోనూ సోబర్స్ సరికొత్త చరిత్ర లిఖించారు. 1968లో నాటింగ్హామ్షైర్ తరఫున ఆడుతున్న సమయంలో, గ్లామోర్గాన్ బౌలర్ వేసిన ఒకే ఓవర్లో ఆరు సిక్సర్లు కొట్టి ఈ ఘనత సాధించిన మొదటి బ్యాటర్గా ఆయన నిలిచారు.
